Şimdi Saʿd-âbâda bak evvelkinden aʿlâ mıdır

I
Şimdi Saʿd-âbâda bak evvelkinden aʿlâ mıdır 
Gör hele dünyâyı eski bildiğin dünyâ mıdır
Bu görünen bir müzeyyen kasr-ı müstesnâ mıdır 
Yohsa nehr-i cennet üzre cisr-i nev-peydâ mıdır

II
Ben dedim gitdi behişt-i câvidândır yâ felek
Görmüşümdür anda zîrâ nice bin hûr u melek 
Hurrem-âbâdın önünden havza bak tâ kasra dek
Gül-zemîn üzre döşenmiş buz gibi dîbâ mıdır

III
Gûş kıldım kim bu gün ey dil-rübâ-yı gonca-leb 
Bir dıraht altında sen etmekdesin zevk u tarab 
Sıklet olmazsa eğer bir iki saʿatcik aceb
Biz de varsak mı efendim yanınız tenhâ mıdır

IV
Oldu bu şarkı hele şarkıların ber-cestesi 
Dil-güşâdır çün sabâ her nağme-i âhestesi 
Söz Nedîmindir aceb tarz-ı hasendir bestesi 
Güftesi ammâ ki bilmem besteden aʿlâ mıdır
Nedîm