-1-
Eşkbâr itdim cihânı çeşm-î giryânımla ben
Gamfezâyı 'âlem oldum hüzn-i vicdânımla ben
Derdnâkim şad ü handân olmadım cânımla ben
⁠         Bîgam olmam hemnişîn olsam da cânânımla ben
⁠         Derdnâkim imtizâc etsem de dermânımla ben

-2-
Kimde görmüştür bu hâli söylesin ehl-i cihân
Dilberimde eylemiştir bak tecessüm ân ü şân
Rûh bulmuş aşk bende işte hâlim terceman
⁠        Kıldı ehl-i aşkı hayrân görmedim hûbanda ân
⁠        Mâh-ı ken'ânım benimle mâh-ı ken'ânımla ben

-3-
Bagtete geldikçe yâda ol nigâr-ı işvekâr
Cûş eder seyl-i sirişkim bak misâl-i cûybâr
Cisme mehzûl eyliyor bu girye-i bîihtiyâr
⁠        Zan iderler bir gülistândan geçer ebr-i bahâr
⁠        Ugradıkça kûy-ı yâra eşk-i cûşânımla ben

-4-
Tîşe-i sertîzine cân atmada dil muttasıl
âşıkım etmek yolunda terk-i cân müşkil degil
Etme allah aşkına bir kalb-i bimârı hacil
⁠       İşte Mes'ud işte cân eey kabe-i erbâb-ı dil
⁠       İstediñ geldim rızâ cuyâne kurbânımla ben

-5-
Gamze-i hûn rîzini dil intizâr eyler yine
Hûn-ı cûşânımla olsun pür letâfet yer yine
İnbisât etdikçe göñlüm lütfunu ister yine
⁠       Teşne-i tîgin kalır cân-ı vefâperver yine
⁠       Kerbelâ-yı 'aşkı sîrab eylesem kanımla ben

Cenap Şahabettin